ChampionsLeague

Nan yon anbyans cho nan Istanbul, Galatasaray montre li pa t vini pou fè figirasyon. De (2) ekip yo bay yon bèl batay, ak anpil angajman fizik ak bon faz jwèt, men yo fini pa pataje pwen yo (1-1).

Pou Atlético Madrid, tout je te sou entènasyonal ajanten an, Julián Álvarez, ki te pase 73 minit sou teren an san li pa jwenn chimen filè a. Atakan an ap travèse yon seri move moman: li rete sou 8 match san li pa make, dènye gòl li se te 9 desanm 2025 ki sot pase a, nan viktwa Atlético Madrid kont PSV nan Champions League la.

Se premye fwa depi kòmansman sezon an Álvarez ap viv yon seri match konsa san gòl, yon sitiyasyon ki kòmanse poze kesyon lakay fanatik “Colchoneros” yo, menm si kontribisyon li nan jwèt kolektif la toujou enpòtan.

Atlético Madrid p ap gen anpil tan pou reflechi, paske pwochen randevou a deja pwograme. 25 janvye, nan Liga a, y ap resevwa Mallorca, nan Metropolitano a. Tout moun ap mande tèt yo: Èske Julián Álvarez pral kraze madichon sa a epi retounen sou lis makè yo? Repons lan, se sou teren an n ap jwenn li, dimanch a 8è nan maten.

KÒMANTÈ

Dènye atik yo