Mondyal

Ankèt la ap chèche verifye si federasyon an, ki prezide pa Claudio "Chiqui" Tapia, te fè pase plizyè santèn milyon dola atravè operasyon ki ta ka tonbe anba blanchiman lajan oswa fwod.

Premye eleman ankèt la montre anviwon 260 milyon dola ameriken ki evalye a prèske 230 milyon ewo revni AFA te pase atravè senk kont labank Ozetazini atravè konpayi TourProdEnter LLC, ki te jere kontra komèsyal entènasyonal federasyon an.

Ankèt la vize Claudio Tapia, trezorye AFA a, Pablo Toviggino, ansanm ak TourProdEnter LLC. Daprè La Nacion: "Virman sa yo te gen ladan yo pèman ki rive nan plizyè dizèn milyon dola pou konpayi ki, selon dokiman jounal la analize, pa t montre okenn tras sèvis ki ka idantifye. Konpayi sa yo te sou kontwòl moun ki t ap resevwa èd sosyal epi ki t ap viv nan Bariloche oswa Buenos Aires."

Lajistis ameriken te louvri yon ankèt preliminè depi 2025, aptre otorite jidisyè Ajantin yo te deja avèti Etazini, depi mwa septanm 2024, sou sa yo te rele "zòn risk potansyèl ki gen rapò ak òganizasyon espòtif la."

Nan fen mwa desanm, yon lòt ankèt te revele TourProdEnter LLC te sèvi kòm yon "veyikil koleksyon" pou kontra entènasyonal AFA yo, tankou kontra Adidas ki vo 53 milyon dola ak kontra Warner ki vo 35 milyon dola.

An retou, konpayi an te resevwa 30 % sou revni entènasyonal AFA yo aprè taks pandan kat dènye ane yo, ansanm ak yon komisyon 10 % sou depans lojistik operasyon sa yo.

Pou fini, La Nacion presize: "Tranzaksyon sa yo fè pati dokiman Depatman Jistis ameriken ak FBI ap egzamine kounye a pou detèmine si yo dwe louvri yon ankèt kriminèl fòmèl ki tonbe anba jiridiksyon Etazini."

Si ankèt la debouche sou pouswit jidisyè, dosye sa a ta ka vin youn nan pi gwo eskandal finansye ki janm frape Federasyon foutbòl Ajantin pandan dènye ane yo.

KÒMANTÈ

Dènye atik yo