SeleksyonNasyonal

Selon enfòmasyon Dynamique Info Sport rapòte, FHF la ta deja ap evalye pwofil yon nouvo antrenè pou prepare ekip la pou pwochen kanpay Lig Nasyon CONCACAF lan, ki dwe kòmanse nan mwa septanm k ap vini la.

Menm sous lan fè konnen kwòdinasyon teknik Federasyon an, direksyon teknik la, sekretarya jeneral la ansanm ak manm Komite Nòmalizasyon FHF yo ta rive sou yon menm pozisyon, ki se revoke Sébastien Migné kòm seleksyonnè ekip nasyonal la.

Sepandan, kesyon kontra a rete yon eleman enpòtan nan dosye a. Migné toujou lye ak Federasyon ayisyèn foutbòl jiska fen ane 2026 la, sa ki soulve kesyon sou konsekans finansye yon posib separasyon ant de pati yo.

Pou kounya, pa gen okenn anons ofisyèl ki fèt sou avni antrenè fransè a. Men tou, li poko klè si obligasyon kontra yo pral pouse FHF kenbe l nan pòs la jiskaske kontra a fini, oubyen si yon revokasyon ap fèt ak pèman yon endemnizasyon.

Pandan dosye a kontinye ap evolye, tout je rete fikse sou desizyon final responsab FHF yo, pandan seleksyon ayisyèn lan ap prepare pou pwochen randevou entènasyonal li yo aprè patisipasyon l nan 23èm edisyon Koup Dimond lan.

KÒMANTÈ

Dènye atik yo